Welcome To Somali Culture and Art Page
Xulka Qaranka Kubadda Cagta Soomaaliya oo 2-1 uga adkaaday Xulka Dalka Djibouti
| Group A |
Kenya |
Zanzibar |
Rwanda |
Eritrea |
| Group B |
Ethiopia |
Uganda |
Djibouti |
Somalia |
| Group C |
Brundi |
Sudan |
Tanzania |
- |
Axad, November 27, 2005(HOL): Xulka Qaranka Kubadda Cagta Soomaaliya ayaa ciyaar maanta dhexmartay Xulka Dalka Jabuuti waxaa uu uga adkaaday 2-1, sida uu shaaca ka qaaday Xoghayaha Guud ee Xiriirka Soomaaliyeed ee Kubadda C/qani Siciid Carab oo hoggaaminaya wafdiga Ciyaartoyda ee tartankan ka qeybgelaya.
Ciyaarta gelinkeedii hore ayaa xulka Soomaaliya waxaa uu u suurtagashay in uu gool u dhaliyo ciyaaryahan C/xakiin oo ka mid ah dhalinyaradii dhawaan laga keenay dalka Ingiriiska si ay u xoojiyaan Xulka Qaranka Soomaaliyeed, waxayna qeybtii hore ee ciyaarta ku soo gebagebowday 1-0 oo ay Soomaaliya hoggaanka ku heysay.
Ciyaarta qeybteedii labaad markii la isugu laabtay ayaa Xulka Jabuuti waxaa u suurtagashay in uu goolkii barbarada dhaliyo, hayeeshee mar kale ayay xulka Soomaaliya iyadoo lagu jiro waqtigii dheeriga ahaa ee lagu daray (additional time) waxaa u suurtagashay ciyaaryahan Maxamed Nuur Shaarkeey in uu dhaliyo goolkii guusha, waxayna ciyaartii ku soo gebagebowday 2-1 oo ay xulka Soomaaliya ku adkaadeen.
C/qani Saciid Carab waxaa uu sheegay in ciyaartoyda Soomaaliyeed kuwii Xamar ka tegay iyo kuwii kale ee Yurub ka tegay ay Kubadda si wanaagsan isula qeybsadeen, isla markaana uu yaraa ganaax dhinaca garsooraha uga yimid ciyaartoyda Soomaaliyeed, marka laga reebo ciyaaryahan lagu magacaabo Wakiil oo calaamadda Jaalaha qaatay.
Ciyaarta tan xigta xulka Soomaaliya waxay Talaadada soo socota (29-ka bishan) wada yeelan doonaan xulka Suudaan, midka xigana Itoobiya, kan ugu dambeeyana Uganda, iyadoo kulamadaasina uu C/qani sheegay in ay guul ka keeni doonaan Xulka Soomaaliyeed, inkastoo Kubadduna Cad iyo Madow tahay oo adigoo awood leh mararka qaarkood lagaa badin karo.
Tartankan oo lagu qabanayo Magaalada Kigali ee Dalka Rwanda, isla markaana ay ka qeybgelayaan 11 dal ayaa qorshuhu ahaa in seddex group loo kala qeybiyo, waxaana haatan laga dhigay labo group oo min shan kooxood ah kadib markii daqiiqadihii ugu dambeeyay ee tartanka bilaaban lahaa uu xulka Kenya sheegay in uusan tartanka ka qeybgeleynin sanadkan.
A Dirshe |
